Vill Barcelona fá John O'Shea?

Ein allra athyglisverðasta fótboltafrétt dagsins birtist í spænska dagblaðinu Sport. Þar er John O'Shea, hinn fjölhæfi leikmaður Manchester United, orðaður við Evrópumeistara Barcelona.

Börsungar vilja víst fá leikmann sem getur leyst hinar ýmsu stöður og horfa til O'Shea í þeim efnum.

Liðinu vantar meðal annars varamann fyrir bakvörðinn Dani Alves en einnig kemur Cesar Azpilicueta hjá Osasuna til greina í það hlutverk.

O'Shea er sem stendur á meiðslalistanum en enginn leikmaður lék fleiri leiki með United á síðustu leiktíð en þessi írski leikmaður. Fróðlegt verður að sjá hvort eitthvað sé til í þessum fréttum spænska blaðsins en það er allavega skemmtileg tilhugsun að sjá O'Shea í búningi Barcelona við hlið Messi og Xavi.