Benítez vill kaupa Kuyt til Inter

Dirk Kuyt gæti endurnýjað kynnin við Rafael Benítez sem hefur hug á að kaupa Hollendinginn til Inter Milan frá Liverpool.

Umboðsmaður hans sagði þetta við Voetbal International í Hollandi í dag.

"Það er áhugi til staðar frá Inter en Dirk hefur enn ekki ákveðið hvort hann vilji fara frá Liverpool eða ekki. Hann þarf að hugsa þetta vel," sagði umboðsmaðurinn um hinn þrítuga Kuyt.

"Þetta er líka flókið þar sem hann er á samningi hjá Liverpool. Það þarf að kaupa hann. Hvað sem gerist á hann bara góða kosti í stöðunni, sem er jákvætt," sagði hann og bætti við að mögulega gæti Liverpool fengið leikmann í skiptum frá Inter fyrir Kuyt.