Atli Viðar vildi ná þrennunni

FH-ingnum Atla Viðari Björnssyni tókst ekki að fullkomna þrennuna í leik Fylkis og FH í gærkvöldi en leikurinn endaði með 2-2 jafntefli í stórskemmtilegum leik.

Atli Viðar fékk fjölmörg tækifæri til að tryggja gestunum úr Hafnarfirði öll þrjú stigin en lukkudísirnar voru ekki með Dalvíkingnum að þessu sinni. Hann stóð sig þó frábærlega í leiknum og jafnaði með tveimur mörkum eftir að Fylkir hafði komist í vænlega 2-0 stöðu.

„Ég fékk svo sannarlega færin til að ná þrennunni og tryggja okkur sigurinn. Ég er virkilega súr með þetta og það er svolítið skrýtin tilfinning að hafa skorað tvö mörk en vera engan veginn sáttur við sjálfan sig," sagði Atli Viðar í leikslok.

FH-ingar óðu í færum í seinni hálfleik og með hreinum ólíkindum að Íslandsmeistararnir skuli ekki hafa skorað fleiri mörk í leiknum. Bæði lið voru hins vegar að skapa sér færi sem hægt hefði verið að dæma vítaspyrnur á báðum vítateigum vallarins í seinni hálfleik.

„Við vildum svo sannarlega öll þrjú stigin, sérstaklega þar sem við náðum að jafna leikinn og urðum einum leikmanni fleiri. Við byrjuðum leikinn mjög illa en sýnum karakter með að koma tilbaka og yfirspila Fylkismenn á löngum köflum. Við áttum auðvitað að vinna þennan leik en það vantaði meiri gæði í sókninni," segir Atli en Fjalar Þorgeirsson varði frábærlega hvað eftir annað í marki Fylkismanna. „Fjalar er auðvitað frábær markvörður og við þurftum að gera betur til að koma tuðrunni framhjá honum í þessum leik."

Íslandsmeistararnir hafa farið hægt af stað í sumar en Atli Viðar telur að það séu batamerki á liðinu. „Við fórum loksins að spila flottan sóknarbolta og fengum í kjölfarið fullt af færum. Ég vona að þetta sé að koma hjá okkur og hjá mér sjálfum. Það skiptir ekki máli fyrir mig hvort ég er að skora mörk ef við erum að fá þrjú stig. Í þessum leik áttum við að hirða öll stigin."