Miður sín og furðu lostnir

Ættingjar leigubílstjórans Derricks Bird, sem skaut tólf manns á norðvestanverðu Englandi í síðustu viku, segjast ekkert skilja í því hvað varð til þess að morðæðið rann á manninn.

Meðal hinna látnu er David, bróðir Derricks, og lögmaður fjölskyldunnar.

„Við erum algerlega miður okkar vegna dauða föður okkar, Derricks Bird," segja synir hans, Graeme og Jamie Bird, í yfirlýsingu sem sóknarprestur þeirra sendi fjölmiðlum.

„Gagnvart okkur var hann viðkunnanlegasti maður sem hægt var að kynnast. Hann var ástkær faðir og nýorðinn afi," segir í yfirlýsingunni.

„Við viljum segja að við vitum ekki hvers vegna pabbi okkar framdi þessa hræðilegu glæpi. Við erum báðir fullir sektarkenndar."

Brian Bird, bróðir Derricks og Davids, sendi einnig frá sér yfirlýsingu þar sem hann segir fjölskylduna vera í sorg.

„Dauði beggja bræðra minna er skelfilegur. Þeir voru báðir mjög umhyggjusamir fjölskyldumenn," segir hann. „Við getum ekki gefið neinar skýringar á því hvers vegna Derrick tók upp á því að fremja þessa glæpi. Við erum í áfalli og skelfingu lostin."