Varaformaður BSRB segir tillögu félagsmálaráðherra stríðsyfirlýsingu

Varaformaður BSRB segir tillögu félagsmálaráðherra um frystingu launa opinberra starfsmanna til 2013 stríðsyfirlýsingu. Fjármálaráðherra segir of snemmt að taka ákvarðanir svo langt fram í tímann nú.

Talsmenn opinberra starfsmanna hafa í dag gagnrýnt tillögu Árna Páls Árnasonar, félagsmálaráðherra, um frystingu launa þeirra næstu þrjú árin. Í hádegisfréttum Stöðvar 2 sagði formaður Bandalags háskólamanna að tillagan væri atlaga að háskólamenntuðu starfsfólki á opinberum vinnumarkaði.

Í svipaðan streng tekur Árni Stefán Jónsson, varaformaður BSRB, sem vill frekar auka kaupmátt en draga úr honum til að koma hjólunum í gang.

Steingrímur J. Sigfússon, fjármálaráðherra, segir málið ekki hafa verið rætt á ríkisstjórnarfundi í morgun, en Árni Páll mun ekki hafa rætt hugmyndina í ríkisstjórninni áður en greinin um þjóðarsáttina birtist.