Bíða eftir viðbrögðum - ræddi við Wouter Bos

Steingrímur J. Sigfússon, fjármálaráðherra, segir að enn sé beðið eftir viðbrögðum frá Hollendingum og Bretum við ósk íslenskra stjórnvalda um frekari viðræður í Icesave deilunni. Steingrímur ræddi við Wouter Bos áður en hann lét af embætti fjármálaráðherra Hollands í dag. Hann hefur ekki rætt við eftirmann Bos.

Íslenska samninganefndin undir forystu Lee Bucheit fór til Bretlands í morgun og bíður þar í viðbragðsstöðu. Engir fundir hafa verið ákveðnir, að sögn Steingríms. „Það liggur ekki fyrir hvort það verði á morgun eða á fimmtudag. Við erum auðvitað að vonast eftir því að hægt verði að halda áfram en það er ekki búið að ákveða neitt í þeim efnum."

Hollendingar og Bretar lögðu fram tilboð í síðustu viku sem fól í sér breytt vaxtakjör á Icesave láninu. Um var að ræða breytilega vexti með 2,75 prósenta álagi auk þess sem boðið var upp tvö ár án vaxta.

„Það er augljóst mál að það hefur skapast nýr og miklu betri grundvöllur fyrir samkomulagi með tilboði þeirra. Það kemur heilmikið til móts við okkur. Við þurfum að vinna úr því og ræða það sem út af stendur," segir Steingrímur.