Dowie tekinn við stjórn Hull

Iain Dowie hefur skrifað undir samning við Hull og stýrir liðinu út leiktíðina. Dowie var rekinn frá QPR árið 2008 eftir aðeins 15 leiki í starfi.

Einnig hefur hann stýrt Crystal Palace, Charlton og þá vann hann um stutta stund í þjálfarateymi Alan Shearer hjá Newcastle síðasta tímabil en liðið féll í 1. deildina.

Dowie tekur við Hull af Phil Brown sem rekinn var í vikunni. Ljóst er að ljósabekkjanotkun Dowie er allavega minni en hjá Brown.

Hull er í næstneðsta sæti úrvalsdeildarinnar, þremur stigum frá öruggu sæti. Fyrsti leikur liðsins undir stjórn Dowie verður gegn botnliði Portsmouth um helgina.

Gary Megson, Terry Venables, Avram Grant og Mark Hughes voru einnig orðaðir við stöðuna.