David James kann vel að meta Capello

David James, markvörður Portsmouth, segir að Fabio Capello, landsliðsþjálfari englendinga hafi öðlast virðingu leikmanna með því að vera óhræddur við að segja hlutina eins og þeir eru.

„Hann kemur sér beint að efninu, hann veit hvað hann vill og segir hlutina beint út," sagði David James við Sky Sport Magazine.

„Ef að hann sér eitthvað gott þá segir hann það strax og það skiptir engu máli hver þú ert. Hann hefur öðlast virðingu leikmanna með því að koma hreint fram," bætti James við.

David James hefur trú á því að englendingar geti náð góðum árangri á HM næsta sumar.

„Við erum með frábæran stjóra, mjög gott þjálfarateymi og augljóslega fullt af hágæða leikmönnum. Ef allt gengur upp hjá okkur eigum við góða möguleika í keppninni," sagði James að lokum.