Rússar telja sjóræningja réttdræpa -skildu tíu eftir á rúmsjó

Tíu sómalskir sjóræningjar sem rússneskt herskip sleppti 600 kílómetra frá landi fórust allir að sögn norsku vefsíðunnar vg.no.

Forsagan var sú að ellefu sjóræningjar réðust um borð í rússneskt olíuskip undan ströndum Jemens. Skipverjarnir 23 lokuðu sig inni í öryggisherbergi þar sem sjóræningjarnir komust ekki inn.

Þar sem sjóræningjarnir höfðu enga gísla til að beita fyrir sig réðust rússneskir sjóliðar um borð í skipið. Þeir drápu einn sjóræningjann og tóku hina höndum.

Þeir voru svo settir um borð í lítinn bát án nokkurra leiðsögutækja og skildir eftir á hafinu 600 kílómetra frá landi.

BBC fréttastofan segir að rússneski ofurstinn Alexei Kuznetsov hafi verið spurður um af hverju þeir hefðu skilið mennina eftir á opnu hafi.

Hann svaraði; -Af hverju ættum við að vera að fóðra eitthvað sjóræningjagengi?

Engin hætta er á að ofurstinn fái skömm í hattinn fyrir þetta svar. Vladimir Putin forseti Rússlands tók málið upp á blaðamannafundi í síðustu viku.

Hann sagði að nauðsynlegt væri að styrkja alþjóðalög til þess að hægt væri að draga sjóræningja fyrir dóm hvar sem er í heiminum.

Svo sagði Putin; -En þangað til það verður gert verðum við að meðhöndla sjóræningja eins og forfeður okkar gerðu í gamla daga. Þið skiljið sjálfsagt hvað ég er að segja.