Leikmenn Portsmouth íhuga að taka á sig launalækkanir

Avram Grant, knattspyrnustjóri Portsmouth, er að skoða það með leikmönnum sínum að taka á sig launalækkanir í kjölfar þess að félagið er sett í greiðslustöðvun.

Þeir hyggjast gera það til að reyna að koma í veg fyrir blóðugar uppsagnir á starfsfólki félagsins.

„Tveir leikmenn komu að máli við mig með þessa hugmynd. Það er sorglegt ástand hérna hjá félaginu," sagði Grant.

Fjölmiðlafulltrúi Portsmouth frétti af því í gær að leggja ætti hans embætti niður og sagði upp störfum í gær. Framtíðin hjá mörgum sem starfa fyrir félagið er í lausu lofti.