Íbúarnir flýja álögurnar á Álftanesi

Fjöldi Álftnesinga ætlar að flytja lögheimili sitt yfir í annað sveitarfélag til að koma sér undan hærri álögum vegna fjárhagsvandræða Álftaness, eftir því sem kom fram í fréttum RÚV. Pálmi Másson bæjarstjóri segir, í samtali við Vísi, að bæjaryfirvöld hafi verið meðvituð um það að þær aðgerðir að hækka útsvar og fasteignaskatt gætu haft þetta í för með sér.

„Við höfum verið að fylgjast með þessu frá þeim tíma sem þetta tók gildi og við höfum ekki tekið eftir neinum óvenjulegum breytingum," segir Pálmi. Það sé svipaður fólksfjöldi sem hefur flutt frá sveitarfélaginu núna og á sama tíma í fyrra.

Pálmi segir að ef fólk kýs að flytja lögheimili sitt úr sveitarfélaginu þá geri bæjarfélagið ráð fyrir að fólk sé almennt að flytja. Það sé ekki einungis að flytja lögheimilið sitt til þess að komast undan útsvari. „En að sjálfsögðu reynum við að fylgjast með þessu eftir bestu getu," segir Pálmi.