Bridge og Terry mætast á vellinum á morgun

Roberto Mancini, knattspyrnustjóri Manchester City, hefur staðfest að Wayne Bridge spili gegn Chelsea á morgun. Ljóst er að athygli fjölmiðla í leiknum mun helst beinast að honum og John Terry hjá Chelsea.

Bridge tilkynnti í gær að hann gæfi ekki kost á sér í enska landsliðið. Enska pressan hefur farið hamförum eftir að upp komst að John Terry hélt við fyrrverandi kærustu hans.

Reiknað var með að Mancini myndi gefa Bridge frí frá leiknum á morgun til að forðast kastljós fjölmiðla. Nú hefur Mancini hinsvegar gefið það út að Bridge sé tilbúinn að spila þennan leik.

Leikur Chelsea og Manchester City á morgun hefst 12:45.