Vonast enn eftir samkomulagi

Ríkisstjórnin vonast enn til þess að hægt verði að landa nýju Icesave samkomulagi fyrir þjóðaratkvæðagreiðslu sem fara á fram eftir átta daga. Samninganefnd Íslands fundaði með Bretum og Hollendingum í gær án árangurs. Nefndin kemur til landsins í dag.

Ríkisstjórnin ætlar að funda með samninganefndinni síðdegis til að fara yfir stöðu mála.

Jóhanna Sigurðardóttir, forsætisráðherra, segir að séu vonbrigði að ekki hafi náðst niðurstaða á fundi samninganefndarinnar í gær. Hún telur enn hægt að ná samkomulagi fyrir þjóðaratkvæðagreiðslu sem fara fram laugardaginn eftir viku. „Við teljum að það sé ekki sé hægt að líta svo á að það hafi slitnað upp úr viðræðum," segir Jóhanna. „Auðvitað er málið erfitt og þungt en við teljum að það séu enn möguleikar í þessari stöðu og það sé ekki fullreynt með það að við getum náð einhverri sameiginlegri ásættanlegri niðurstöðu milli þjóðanna."

Steingrímur J. Sigfússon, fjármálaráðherra, segir að sögusagnir um að íslenska samninganefndin hafi gengi út af fundinum í gær séu úr lausu lofti gripnar.

Steingrímur segir að auðvelt hefði verið að ganga frá nýju samkomulagi ef Bretar og Hollendingar hefðu verið tilbúnir til viðræðna. „En því miður varð það svo að það komst aldrei af stað nægileg umræða á þessum fundi um efnisatriði. og okkar hugmyndir. Þeir bitu mjög fast í sitt tilboð og annað hvort vantaði viljann og eða umboðið til að fara í eiginlegar viðræður um það sem útaf stendur og þess vegna varð engin niðurstaða af þessum fundi."