Íslendingar saka Ástrala um að svíkja hvalveiðiþjóðir

Íslendingar saka Ástrala um svik við hvalveiðiþjóðir innan Alþjóðahvalveiðiráðsins með því að leggja fram gagntillögu um hvalveiðar, fullyrðir ástralska blaðið The Australian.

„Það eru engar líkur á því að ástralska tillagan nái fram að ganga þannig að eini tilgangurinn með henni hlýtur að vera að koma í veg fyrir sátt, að koma í veg fyrir málamiðlun," er haft eftir Tómasi H. Heiðar, aðalfulltrúa Íslands hjá Alþjóðahvalveiðiráðinu.

Hvalveiðiþjóðir innan Alþjóðahvalveiðiráðsins hafa unnið að mótun sáttatillögu sem felur í sér að í lok ársins verði hvalveiðibanni sem verið hefur í gildi í 24 ár aflétt. Hvalveiðiþjóðir geti þá veitt takmarkaðan fjölda hvala í atvinnuskyni. Gert er ráð fyrir að tillagan verði flutt á aðalfundi Alþjóðahvalveiðiráðsins í sumar.

Peter Garrett, umhverfisráðherra Ástralíu, sendi hins vegar frá sér gagntillögu í gær. Hann vill að öllum veiðum verði hætt um ótilgreinda framtíð fyrir utan þær veiðar sem frumbyggjar í hvalveiðiríkjum þurfi nauðsynlega á að halda sér til framfærslu.