Ríkið leggur hundrað milljónir í einkasjúkrahús Róberts

Ríkið leggur hundrað milljónir króna í endurbyggingu gamla hersjúkrahússins á varnarsvæðinu, sem Róbert Wessman ætlar að leigja undir einkasjúkrahús.

Framkvæmdum vegna umfangsmikilla endurbóta á sjúkrahúsinu er stjórnað af Þróunarfélagi Keflavíkurflugvallar, sem hyggst síðan leigja það til Iceland Healthcare, félags í eigu Róberts Wessman. Á spítalanum á að starfrækja einkasjúkrahús þar sem boðið verður upp á sérhæfðar meðferðir fyrir útlendinga.

Þróunarfélag Keflavíkurflugvallar er einkahlutafélag, að fullu í eigu ríkisins. Hlutverk þess er að annast rekstur, umsjón og umsýslu eigna ríkisins á hersvæðinu og starfar það samkvæmt samningi við fjármálaráðuneytið. Þróunarfélagið hefur stofnað sérstakt félag, Seltún, sem á að sjá um verkefnið og leggur inn í það 100 milljónir króna.

„Þegar peningar skattborgarans eru notaðir til að fjármagna einkasjúkrahús vakna spurningar fyrir okkur sem skattborgara og þjóðfélagsþegna hvort við viljum tvöfalt heilbrigðiskerfi," segir Ögmundur Jónasson, þingmaður VG.

Ýmsar aðrar spurningar vakni og svör þurfi að fást við þeim áður en haldið er lengra með verkefnið, segir Ögmundur.

„Er eðlilegt að láta peninga úr vösum skattborgarans renna inn í einkarekið heilbrigðiskerfi á sama tíma og við erum að skera niður framlög til almannaþjónustunnar," spyr Ögmundur.

Sem heilbrigðisráðherra átti Ögmundur nokkra fundi með Þróunarfélagi Keflavíkurflugvallar og öðrum forsvarsmönnum verkefnisins. Engar niðurstöður hafi legið þar fyrir, enda viðskiptahugmyndin að mati Ögmundar aldrei fullmótuð.