Franska strandgæslan vill banna sund yfir Ermarsund

Franska strandgæslan vill banna sundmönnum að synda yfir Ermarsundið. Telur strandgæslan það aðeins tímaspursmál hvenær alvarlegt slys verði vegna þungrar skipaumferðar um sundið.

Í umfjöllun um málið á BBC segir að þeim sem vilja synda yfir Ermarsundið hafi fjölgað töluvert á síðustu árum og af þeim sökum hafi franska strandgæslan miklar áhyggjur af ástandinu.

Bent er á að einhver mesta skipaumferð í heimi sé um Ermarsund en um það sigla yfir 500 skip á dag að jafnaði. Þar að auki sigla margar ferjur daglega fram og til baka milli Frakklands og Bretlands.

Jean-Christope Burvingt einn af forstjórum frönsku strandgæslunnar segist óttast að sundmenn lendi í slysi vegna skipaumferðarinnar og að hættan á slíku aukist með hverju árinu.

Samtökin sem sjá um Ermarsundssundið vísa þessum áhyggjum á bug. Talsmaður þeirra segir að sundið sé nákvæmlega skipulagt með tilliti til skipaumferðarinnar og að fyllsta öryggis sundmannanna sé gætt í hvert skipti sem þeir syndi þessa vinsælu 34 kílómetra löngu sundleið.