Beina útsendingin með Chomsky að hefjast í Háskólabíó

Nú styttist í að bein útsending með bandaríska rithöfundinum Noam Chomsky hefjist í sal eitt í Háskólabíó. Aðgangur að fyrirlestrinum er ókeypis en gríðarlegur áhugi er fyrir honum.

Fyrirlesturinn er á vegum Alþjóðlegu kvikmyndahátíðarinnar í Reykjavík. Hann ber yfirskriftina Vonir og væntingar og mun Chomsky meðal annars fjalla um hvað við getum lært af efnahagshruninu á Vesturlöndum. Fjallar hann sérstaklega um Ísland í því sambandi. Umhverfismál verða einnig tekin fyrir, en Chomsky ræðir meðal annars um framtíðina í orkumálum, t.d. hvort besta leiðin fyrir Íslendinga sé að selja álverum ódýra orku. Þá mun hann koma inn á framlag menntamanna til samfélagsumræðunnar.

Stjórnandi fyrirlestrarins verður kanadíski kvikmyndagerðarmaðurinn Peter Wintonick sem gerði kvikmyndina Manufacturing Consent: Noam Chomsky and the Media árið 1992, sem er sýnd á RIFF. Noam Chomsky er bandarískur málvísindamaður, rithöfundur og virkur þátttakandi í stjórnmálum. Hann er prófessor emeritus í málvísindum við hinn virta háskóla Massachusetts Institute of Technology (MIT), þar sem hann hefur unnið frá árinu 1955.

Við sama tækifæri fara fram pallborðsumræður um Ísland sem hefur gengið í gegnum pólitískar og félagslegar hamfarir undanfarin tvö ár. Í umræðunum verður horft fram á veginn og tilraun gerð til að móta sýn á hlutverk ólíkra afla samfélagsins til að hafa áhrif til lengri tíma, og hvernig við sjáum fyrir okkur að Ísland geti átt afturkvæmt úr kreppunni inn í eðlilegt félagslegt umhverfi þar sem kreppupólitíkin hefur vikið fyrir róttækri pólitík og getu og vilja til umbóta og breytinga.

Þátttakendur í pallborðsumræðunum eru: Irma Erlingsdóttir, Guðni Elísson, Sveinn Atli Gunnarsson og Sólveig Anna Jónsdóttir. Stjórnandi er Jón Ólafsson, prófessor í heimspeki við Félagsvísindadeild Háskólans á Bifröst.

Dagskráin hefst klukkan 17 í sal eitt í Háskólabíó.