Klippti á naflastrenginn og fingurgóminn með

Bresk ljósmóðir varð fyrir því óhappi á dögunum að klippa framan af fingurgómi nýfædds barns þegar hún ætlaði að klippa á naflastrenginn. Samkvæmt bresku fréttstofunni SKY þá tók fæðingin fjórar klukkustundir.

Í heiminn kom lítil stúlka sem hefur verið nefnd Ishika Kainth. Hún hafði þó ekki lifað lengi þegar hún lenti í sínu fyrsta slysi en ljósmóðirin klippti óvart framan af fingurgómnum um leið og hún klippti á naflastrenginn.

Faðir stúlkunnar, Parminder Kainth, sá að ljósmóðirin hafði klippti framan af fingurgóminum og bar það upp á ljósmóðurina, sem hefur starfað sem slík í 22 ár, en hún neitaði að hafa gert mistök í fyrstu.

Faðirinn, sem var í miklu uppnámi, sagði þá við hana: „En sérðu ekki allt blóðið?"

Nýbakaða móðirin, Jasvir, sagði í viðtali við SKY fréttastofuna að þeim hefði brugðið verulega þegar þau urðu vitni að slysinu.

Ljósmóðirin sá að lokum af sér og viðurkenndi mistökin. En í staðinn fyrir að hlúa að nýfæddu barninu fór hún út úr herberginu til þess að sækja aðstoð.

Foreldrar stúlkunnar gagnrýna það harðlega enda stóðu þau tvö ein eftir í herberginu með nýfædda og stórslasaða dóttur sína í fanginu.

Inn komu síðan læknar sem náðu að sauma fingurinn aftur á stúlkuna. Vonast er til þess að Ishika litla nái fullum bata.

Forsvarsmenn spítalans, sem er í Brighton, segja málið í rannsókn.