Foster á leið til Birmingham

Fréttastofa BBC greindi frá því í kvöld að Ben Foster væri á leið til Birmingham frá Manchester United fyrir fjórar milljónir punda. Foster er 27 ára gamall markvörður en er sem stendur aftarlega í goggunarröðinni hjá United, á eftir Edwin van der Sar og Tomasz Kuzczak. Hann hefur einnig misst sæti sitt í enska landsliðinu og sagði í síðustu viku að hann hefði klúðrað tækifæri sínu til að komast á HM í Suður-Afríku í sumar. Joe Hart varði mark Birmingham í vetur og var valinn í lið ársins í ensku úrvalsdeildinni. Hann er hins vegar lánsmaður frá Manchester City og mun nú snúa aftur þangað. Foster er samningsbundinn United í þrjú ár til viðbótar.