Reynir Leósson lánaður til ÍA næsta sumar

Reynir Leósson mun spila með ÍA í 1. deild karla næsta sumar en þessi 31 árs miðvörður er því aftur á leiðinni á æskustöðvar sínar á Skaganum. Þetta kom fram í kvöldfréttum Stöðvar 2.

Reynir á eitt ár eftir af samingi sínum hjá Val en Hliðarendafélagið lánar hann til Skagamanna sem enduðu í 5. sæti í 1. deildinni síðasta sumar.

Reynir lék síðast með Skagamönnum sumarið 2005 en hann á að baki 132 leiki með liðinu í úrvalsdeild karla.

Reynir fór til sænska liðsins Trelleborg árið 2006 en kom síðan aftur heim og gekk til liðs við Fram. Hann hefur síðan spilað með Valmönnum undanfarin tvö tímabil.