Mourinho neitar því að hafa gagnrýnt Capello

José Mourinho, þjálfari Real Madrid, hefur sent frá sér yfirlýsingu þar sem hann þvertekur fyrir að hafa gagnrýnt Fabio Capello, landsliðsþjálfara Englands.

Haft var eftir Mourinho á dögunum að slæmt gengi enska landsliðsins væri Capello að kenna og að hann væri ekki rétti maðurinn í starfið.

"Viðtalið sem var birt í The Daily Mirror er uppspuni. José Mourinho talaði aldrei við fjölmiðilinn. Þess vegna neitar hann því að hafa sagt þessi orð," segir meðal annars í yfirlýsingunni.

Fulltrúi þjálfarans segir hann vera að íhuga málshöfðun gegn blaðinu.