Margir vilja annað sæti á lista Samfylkingar og Sjálfstæðisflokks

Fjórir sækjast eftir öðru sæti á lista Samfylkingarinnar í Reykjavík fyrir komandi borgarstjórnarkosningar. Oddviti flokksins vill að félagshyggjuflokkarnir taki við stjórn borgarinnar. Þá vilja einnig margir annað sætið á lista Sjálfstæðisflokks. Bæjar- og sveitarstjórnarkosningar fara fram eftir rúma fjóra mánuði

Framboðsfrestur í prófkjöri Samfylkingarinnar í Reykjavík rann út á hádegi í dag. Þrettán frambjóðendur taka þátt í prófkjörinu og sækjast fjórir eftir öðru sæti, sem Steinunn Valdís Óskarsdóttir, skipaði í síðustu kosningum.

Dagur B. Eggertsson, oddviti flokksins, sækist einn eftir fyrsta sæti. Aðspurður telur hann að það muni ekki há flokknum í komandi baráttu að Samfylkingin sitji ríkisstjórn og þurfi að taka óvinsælar ákvarðanir eins skattahækkanir.

„Nei það held ég ekki. Auðvitað gera sér allir ljóst að það eru mjög erfið staða uppi eftir hrunið, í borginni eins og annars staðar. Kosningarnar snúast jú kannski líka um það hverjum er best treystandi að leiða samfélagið út úr hruninu. Er það hugmyndafræðin sem að kom okkur í þá stöðu sem við erum núna eða er það áherslu jafnaðarmanna á velferð, börn og atvinnuuppbyggingu."

Dagur vill ekki gefa út neinar yfirlýsingar varðandi mögulegt meirihlutasamstarf. „Ég hins vegar held að það skipti verulegu máli að eftir kosningarnar taki við félagshyggjustjórn."

Frambjóðendur í prófkjöri Sjálfstæðisflokks komu saman í Iðnó í dag til að kynna sín stefnumál en fimm sækjast eftir öðru sæti á lista flokksins.

Gísli Marteinn Baldursson vildi oddvitasætið fyrir síðustu kosningar en tapaði þá fyrir Vilhjálmi Þ. Vilhjálmssyni. Gísli hefur verið gagnrýndur fyrir að hafa ekki tekið sér frí frá störfum þegar hann hóf nám í Edinborg í Skotlandi árið 2008.

Hann segir að það geti vel verið að pólitísk staða hans sé veik. „Ég átta mig ekkert á því. Ég met hana ekki þannig og það er ekki þau viðbrögð sem ég fæ núna í þessu prófkjöri. Ég ætla að berjast fyrir mínu sæti út frá þeim málum sem ég hef sett á oddinn í þessu prófkjöri," segir Gísli.

Sjálfstæðisflokkurinn beið afhroð í síðustu alþingiskosningum en borgarstjóri er bjartsýnn fyrir komandi kosningar. „Ég vona að okkur gangi vel. Við munum segja kjósendum frá okkar góðu verkum sem að við höfum verið að sinna og frá okkar framtíðaráherslum. Ég treysti því að borgarbúar finni að það er samhljóður með okkur og þeim," segir Hanna Birna Kristjánsdóttir, borgarstjóri og oddviti sjálfstæðismanna.