Reina skrifaði undir sex ára samning við Liverpool

Spænski markvörðurinn Jose Reina er greinilega hæstánægður í herbúðum Liverpool því hann hefur skrifað undir nýjan sex ára samning við félagið.

Reina er 27 ára og hefur á heildina litið verið besti leikmaður Liverpool á tímabilinu. Hann er í hópi bestu markvarða heims.

Við undirritun samningsins sagði hann það líklega bestu fréttir lífsins að hann verði á Anfield næstu sex árin. „Ég er hæstánægður með að hafa skrifað undir nýjan samning. Ég og fjölskylda mín erum mjög ánægð hér," sagði Reina.

„Það er mjög sérstök tilfinning að spila fyrir Liverpool. Ég hef þegar verið hér í fimm ár og mun vera í sex ár til viðbótar. Það er mjög spennandi," sagði Reina sem tilkynnti að börnin sín væru þegar komin með hreim eins og innfæddir í Liverpool-borg og hann væri stoltur af því.