Mascherano ekki með Liverpool í Evrópudeildinni á morgun

Javier Mascherano verður ekki með Liverpool í leiknum gegn Trabzonspor í Evrópudeildinni á morgun. Meiðsli koma í veg fyrir það.

Mascherano hefur óskað eftir því að fá að fara frá Liverpool en ekkert tilboð hefur borist í kappann. Roy Hodgson segir að Argentínumaðurinn sé í framtíðarplönum sínum og að hann hefði notað hann á morgun væri miðjumaðurinn ekki meiddur.

Spili leikmaður í Evrópudeildinni er hann ólöglegur með öðru félagi í Evrópudeildum og þar með ekki líklegt að hann fari.

"Vonandi verður hann klár á mánudaginn," sagði Hodgson um Mascherano en Liverpool mætir þá Manchester City. Hugsanlegt er að Christian Poulsen byrji leikinn í fjarveru hans.

Daniel Agger verður einnig fjarri góðu gamni, hann fékk heilahristing í leiknum gegn Arsenal og þarf að hvílast í nokkra daga.