Benitez: Ég tók Torres útaf af því að hann var orðinn þreyttur

Rafael Benitez, stjóri Liverpool, þurfti að horfa upp á sína menn tapa dýrmætum stigum í ensku úrvalsdeildinni í dag þegar liðið náði aðeins 1-1 jafntefli á móti Birmingham. Liverpool er nú fjórum stigum á eftir Manchester City og er líka búið að leika leik meira.

„Þetta var frábær frammistaða hjá liðinu. Við fengum frábær færi í fyrri og seinni hálfleik og fullt af færum í lokin," sagði Rafael Benitez eftir leikinn.

„Við fengum á okkur klaufalegt mark og það var okkur dýrkeypt að þessu sinni. Liðið brást vel við eftir tapið á móti Benfica og liðið var mjög sókndjarft í þessum leik. Það eru því mikil vonbrigði að vinna ekki leik sem við spilum svona vel," sagði Rafael Benitez.

Rafael Benitez tók Fernando Torres útaf strax á 65. mínútu og það vakti furðu hjá mörgum.

„Ég tók Torres útaf af því að hann var orðinn þreyttur. Við spiluðum í 60 mínútur á tíu mönnum á móti Benfica og Torres var bara útkeyrður. Ngog nýttist okkur vel því hann var með ferska fætur. Hann hreyfði sig líka vel þann tíma sem hann spilaði," sagði Benitez.