Vilja ganga inn í ESB vegna fisksins

Samband strandveiðimanna í Nuuk, NAPP, telur að Grænlendingar geti ekki lengur staðið utan við ESB.

Ein helsta ástæða þess að Grænland dró sig út úr ESB árið 1985 var sú að Grænlendingar töldu sig geta betur farið með fiskveiðistjórnun en það sem þá hét Evrópubandalagið.

Lars Mattæussen, formaður sambandsins, segir í viðtali við grænlenska blaðið Sermitsiaq að þetta eigi ekki lengur við: „Við þurfum að viðurkenna að fiskveiðistjórnunin hefur ekki batnað, og að örfáir einstaklingar ráða yfir öllum botnfiskveiðum.“

Einnig spilar inn í hjá sjómönnunum að brátt skellur á bann í ESB-ríkjum við innflutningi á grænlensku selskinni. Formaður sambands sjómannanna telur að innan ESB hefðu þeir verið í betri aðstöðu til að hafa áhrif á þessa ákvörðun.

„ESB var skapað til að verja hagsmuni aðildarríkja. Við teljum að ESB hefði ekki tekið ákvörðun sem hefði skaðað hagsmuni aðildarríkis,“ segir Mattæussen.

Einnig hefðu innviðir landsins notið góðs af aðild, því þá hefðu styrkir fengist úr þróunarsjóðum sambandsins. Meirihluti Landssambands grænlenskra fiski- og veiðimanna, KNAPK, hafnaði ESB-aðild fyrir sitt leyti í fyrra, og var bann ESB við hvalveiðum, selskinnsölu og breytingar á tollalögum meðal ástæðna sem tilgreindar voru.- kóþ