Handtekinn með amfetamín innvortis

Lögreglustjórinn á Suðurnesjum hefur ákært rúmlega þrítugan karlmann fyrir brot gegn lögum um ávana- og fíkniefni.

Manninum er gefið að sök að hafa í byrjun þessa árs flutt til landsins rúm 640 grömm af amfetamíni. Efnin faldi maðurinn innvortis í endaþarminum.

Umræddur maður, sem er pólskur ríkisborgari, kom hingað til lands frá Varsjá í Póllandi.

Þá hefur ríkissaksóknari ákært annan karlmann fyrir stórfellt fíkniefnabrot. Hann stóð, þann 4. desember á síðasta ári, að innflutningi á tæpum 496 grömmum af kókaíni, sem ætlað var til sölu í ágóðaskyni hér á landi.

Maðurinn flutti fíkniefnin til landsins frá Belgíu með millilendingu í Kaupmannahöfn. Hann kom með þau til landsins sem farþegi og fundust þau í meltingarvegi hans við hefðbundið eftirlit.

Síðari maðurinn er rúmenskur ríkisborgari. Hann er í gæslu í fangelsinu á Litla-Hrauni.

Í báðum tilvikum krefst ákæruvaldið þess að mennirnir verði dæmdir til refsingar og til greiðslu alls sakarkostnaðar.- jss