Segir son sinn ekki hafa látist af slysförum

Faðir Harðar Heimis Sigurðssonar sem lést á sunnudag, ári eftir að hann hlaut mikla áverka þegar ekið var á hann, segir son sinn ekki hafa látist af slysförum. Hann er mjög ósáttur við dóm yfir ökumanninum, en sá var undir áhrifum vímuefna og flúði af vettvangi.

Hörður var 26 ára þegar hann fór ásamt félögum sínum að skemmta sér í miðborginni í janúar í fyrra. Hann var nýlega fluttur að heiman, var farinn að undirbúa lokaritgerð sína í lögfræði. Um nóttina var ekið á hann á stórum Hummer-bíl við Laugaveg. Ökumaðurinn stakk af frá vettvangi en myndir náðust af atvikinu.

Fyrir að hafa ekið á Hörð og þátt sinn í íkveikju hlaut maðurinn þriggja og hálfs árs fangelsi. Hörður hlaut mikla áverka í slysinu og lést eftir líknandi meðferð nú um helgina.

Fjölskylda Harðar er mjög ósátt við dóminn yfir ökumanninum sem olli slysinu. Fjölskyldan tekur fram að reiðin sé ekki góður förunautur þótt erfitt geti verið að bægja henni frá.

Nánar verður rætt við Sigurð Kr. Einarsson, faðir Harðar, og konu hans í Íslandi í dag strax á eftir fréttum.

- Hægt er að horfa á viðtalið hér.