Jóni Gnarr gengur vel að hætta að reykja

„Já, ég held að þetta gangi bara vel hjá honum, allavega síðast þegar ég vissi," segir Heiða Kristín Helgadóttir, aðstoðarkona Jóns Gnarr borgarstjóra í Reykjavík. Eins og Jón Gnarr sagði á Facebook síðu sinni þann 26. ágúst síðastliðinn hætti hann að reykja.

Reglulega hefur Jón komið með uppfærslur um gang mála á Facebook-síðu sinni. Síðasta uppfærsla hjá honum kom þá 31. ágúst. Þar sagði hann: „Fimmti dagur í helvíti. Nenni ekki að barma mér meira yfir því hér. Man varla einusinni hvað ég var að gera í dag. Búinn að vera ótrúlega heimskur og leiðinlegur, röflandi um eitthvað sem skiptir ekki máli. Einbeitingarlaus og pirraður."

Jón hefur verið háður níkótíni frá þrettán ára aldri og ákvað í síðasta mánuði að hætta að reykja og sótti námskeið til þess. Það gerðu einnig félagar hans í Besta flokknum, þeir Einar Örn Benediktsson, Björn Blöndal, Karl Sigurðsson, Páll Hjaltason og Óttar Proppé.

Heiða Kristín segist búast við því að það gangi vel hjá þeim öllum.