Viðræður um fríverslun við Rússa hefjast á næsta ári

Össur Skarphéðinsson, utanríkisviðskiptaráðherra, staðfesti í dag fyrir Íslands hönd að viðræður um fríverslunarsamning við Rússland hefjist í byrjun næsta árs. Staðfestingin fór fram á ráðherrafundi EFTA-ríkjanna í Genf, og samhliða staðfestu EFTA-ríkin viðræður um fríverslun við Hvíta-Rússland og Kasakstan, en ríkin eru í sameiginlegu tollabandalagi með Rússum, að því er fram kemur í tilkynningu frá utanríkisráðuneytinu.

Össur sagði fríverslunarsamning við Rússa vera Íslendingum mikilvægan þar sem töluverður útflutningur er á vörum og þjónustu þangað, og líkur á að hann geti vaxið verulega með góðum fríverslunarsamningi, ekki síst í ljósi aukinna samskipta ríkjanna upp á síðkastið. Össur sagði þennan áfanga mikilvægt skref til að halda áfram vinsamlegri þróun í samvinnu ríkjanna.

Í ræðu sinni rifjaði Össur upp að Vladimír Pútín, forsætisráðherra Rússlands, hefði nýlega lagt blessun sína yfir umfangsmikil verkefni í jarðhita í austurhluta Rússlands, og hugsanlega víðar, sem unnin yrðu með íslenskri tækniþekkingu. Hann taldi að fríverslunarsamningur gæti ýtt undir viðskipti þjóðanna á sviði orkuvinnslu og afleiddra verkefna.

Á ráðherrafundinum í Genf tók Össur jafnframt upp ósk Færeyinga um að EFTA skoði möguleika á inngöngu þeirra í EFTA í framtíðinni, og lýsti jákvæðri afstöðu íslensku ríkisstjórnarinnar.