Einhleypum konum verði heimilt að nota gjafaegg

Frumvarp um breytingu á lögum um tæknifrjóvgun þess efnis að einhleypum konum með skerta frjósemi verði heimilt að nota gjafaeggfrumu við glasafrjóvgun er nú í undirbúningi og gert er ráð fyrir að það verði lagt fram á vorþingi.

Þetta kemur fram í svari Álfheiðar Ingadóttur, heilbrigðisráðherra, við fyrirspurn sem Anna Pála Sverrisdóttir, varaþingmaður Samfylkingarinnar, beindi til Álfheiðar í desember á síðasta ári. Samkvæmt núgildandi lögum um tæknifrjóvgun er ekki heimilt að nota gjafaeggfrumu við glasafrjóvgun einhleyprar konu.