Dowie: Þetta er grimmur leikur

„Fótbolti er grimmur leikur," segir Iain Dowie sem stýrði Hull í fyrsta sinn í gær. Liðið er að berjast fyrir lífi sínu í deildinni en tapaði 3-2 fyrir Hermanni Hreiðarssyni og félögum í Portsmouth.

Hull var yfir 2-1 þegar þrjár mínútur voru til leiksloka. Þá skoruðu Jamie O'Hara og Kanu og tryggðu heimamönnum á Fratton Park öll stigin.

„Það voru þó nokkrir hlutir sem ég gat glaðst yfir, þar á meðal andinn í liðinu. Við töpuðum fyrstu orrustu af níu en það þýðir ekki að vera neikvæður," segir Dowie.

„Við erum allir svekktir en ég þarf að sjá til þess að liðið hefur enn trú á þessu verkefni. Trú er mjög mikilvæg í þessu."