Engin ákvörðun tekin um forgang

Ekkert liggur fyrir um hvort dómur Héraðsdóms Reykjavíkur frá því um miðjan mánuðinn, um að óheimilt sé að gengistryggja lán, fái flýtimeðferð í Hæstarétti. Búið er að áfrýja málinu, en miðað við það sem almennt gerist gæti dóms Hæstaréttar verið að vænta eftir sex til átta mánuði.

„Meginreglan er sú að mál eru sett á dagskrá í þeirri röð sem þau eru tilbúin til flutnings,“ segir Þorsteinn A. Jónsson, skrifstofustjóri Hæstaréttar. „En svo eru frávik sem byggjast á forföllum lögmanna,“ bætir hann við, en einnig geti líka aðrar tæknilegar ástæður legið að baki því að mál fari í annarri röð fyrir dóminn. „En einu málin sem beinlínis eru tekin fram fyrir eru sakamál þar sem sakborningar sitja í gæsluvarðhaldi.“

Þorsteinn segir hins vegar ekki hægt að segja til um það á þessari stundu hvort annað vinnulag yrði haft á varðandi nýfallinn dóm Héraðsdóms Reykjavíkur. „Það yrði bara skoðað þegar málið er tilbúið til flutnings hvort tilefni sé til þess,“ segir hann.

Þorsteinn segir að eftir kærufrest hafi lögmenn 13 vikur til að undirbúa mál sitt til flutnings. „Þá er svolítið mismunandi, eftir því hvenær árs er, hvenær málið fer á dagskrá og gætu liðið þrír til fimm mánuðir,“ segir Þorsteinn. - óká