Ekkert eftirlit með rafsegulsviði

Ekkert eftirlit er haft með rafsegulsviði á vinnustöðum eins og með hljóð-og loftmengun og eru engar reglugerðir til um það hér á landi. Forstjóri Vinnueftirlitsins segir mikilvægt að settar verðir slíkar reglur og er til í samstarf með Geislavörnum ríkisins.

Drífa Hjartardóttir fyrrverandi þingmaður Sjálfstæðisflokksins lagði sjö sinnum fram þingsályktun um að rannsóknir yrðu gerðar á áhrifum rafsegulsviðs á mannslíkamann af völdum rafmagnsveitulína, orkuveitna, spennustöðva og fjarskiptamastra sérstaklega með tilliti til nýgengis krabbameins. Þingsályktunin dagaði alltaf uppi í nefnd.

Á mörgum vinnustöðum getur rafsegulsvið af völdum rafmagnstækja oft verið hátt. Ekkert eftirlit er haft með því.

„Um þetta gilda ekki neinar reglur hér á landi þannig að það er ekki formlegt og ákveðið eftirlit með þessum á vinnustöðum með sama hætti og með hávaða- og loftmengun," segir Eyjólfur Þór Sæmundsson forstjóri Vinnueftirlitsins.

Tekið sé mið af vinnuverndarreglum á evrópska efnahagssvæðinu og núna sé reglugerð í smíðum um rafsegulsvið. Eyjólfur gerir ráð fyrir að þær líti dagsins ljós eftir tvö ár. Eyjólfur telur ríka þörf á slíkum reglum og eftirlit eigi að vera með þessum málum. Þetta sé töluvert umdeilt mál. Annars sé það hlutverk félags- og tryggingamálaráðuneytisins að setja slíkar reglur hér á landi.

Drífa lagði til í hádegisfréttum í gær að Geislavarnir ríkisins, Vinnueftirlitið, löggildingarstofa og Orkustofnun ynnu að þessum málum í sameiningu. Eyjólfur segir það góða hugmynd.

„Við bíðum eftir því að reglugerðir líti dagsins ljós um þessi mál og við erum að sjálfsögðu reiðubúin til samstarfs um það," segir Eyjólfur.