Listaverksafn Kaupþings í eigu Arion banka

Listaverkasafn gamla Kaupþings verður áfram eigu Arion banka samkvæmt samkomulagi sem undirritað var í dag.

Listaverkasöfn bankanna komust óvart í einkaeign þegar bankarnir voru einkavæddir á sínum tíma. Bankarnir áttu um fjögur þúsund verk þegar þeir hrundu, þar af Kaupþing um tólf hundruð.

Katrín Jakobsdóttir, menntamálaráðherra, talaði fyrir því á sínum tíma að færa listaverkin aftur til þjóðarinnar eftir að ríkið tók bankana yfir.

Miðað við það samkomulag sem undirritað var í Þjóðmenningarhúsinu í dag er ljóst að þau áform eru nú úr sögunni.

Arion banki mun halda safninu en ríkið fær forkaupsrétt að þeim tæplega tvö hundruð verkum sem talin eru mikilvæg fyrir íslenska listasögu. Tvö þessara verka voru færð Listasafni Íslands að gjöf í dag - en um ræða verkin Flosagjá eftir Þórarinn B. Þorláksson og Mansöngur eftir Jóhönnu Yngvadóttur.

„Ég lít svo á að þetta sé fyrsta skrefið í því," segir Katrín Jakobsdóttir, menntamálaráðherra, aðspurð hvers vegna verkin hafi ekki verið færð aftur til þjóðarinnar líkt og hún sagði á sínum tíma. „Það sem við gerðum í raun og veru er að við létum fara fram ákveðið listfræðilegt mat á söfnum bankanna. Þau eru mjög stór og niðurstöður okkar sérfræðinga er að þarna er ákveðin hluti verka sem er talin mikilvægur að komist í eigu þjóðarinnar og ríkið fær kauprétt á þessum verkum til tólf ára."

Katrín segir að legið hafi fyrir að þjóðin þyrfti að kaupa verkin. „Þegar bankarnir voru seldir á sínum tíma þá fóru verkin með. Það var gagnrýnt á sínum tíma en við getum ekki tekið allt aftur sem gert er," segir Katrín.