Ekki smart að hafa tvo miðaldra karla

Það er ekkert voða smart að hafa tvo miðaldra karla í tveimur efstu sætunum, segir Hanna Bjartmars Arnardóttir, frambjóðandi Samfylkingar til sveitarstjórnarkosninga.

Samfylkingin blés til prófkjörs á dögunum. Eftir það er Jónas Sigurðsson í fyrsta sæti og Valdimar Leó Friðriksson í öðru. Hanna sóttist eftir öðru sæti, en hafnaði í þriðja sæti. Í fjórða sæti er Anna Sigríður Guðnadóttir. Anna sóttist einnig eftir öðru sætinu.

Heimildir blaðsins herma að rætt hafi verið um að Valdimar verði færður neðar á listann og kona verði sett í annað sæti. Hanna segist ekki hafa farið fram á eitt né neitt í þeim efnum og segist engar upplýsingar hafa um hvort Valdimar verði færður.

Í prófkjörinu var ekki stuðst við fléttulista, þannig að annað kynið yrði ekki í tveimur sætum í röð.

„Eftir á að hyggja hefði kannski átt að gera það, í efstu sætin tvö," segir Hanna.

Anna Sigríður segist ekki alveg vita hvernig henni lítist á að taka fjórða sætið á listanum, samkvæmt niðurstöðu prófkjörsins. Ekki sé búið að taka ákvörðun um listann.

Prófkjörið var ekki bindandi, og kjörstjórn liggur nú yfir niðurstöðum þess. Tillaga nefndarinnar verður lögð fram á fimmtudag á félagsfundi. Anna segir að þá hljóti að koma „einhver farsæl lausn".- kóþ