Gérard Houllier búinn að gera þriggja ára samning við Aston Villa

Gérard Houllier hefur samþykkt þriggja ára samning um að gerast knattspyrnstjóri Aston Villa samkvæmt frétt hjá Guardian en enskir miðlar höfðu fyrir nokkru birt fréttir um að allt stefndi í það að þessi fyrrum stjóri Liverpool snéri aftur í ensku úrvalsdeildina.

Kevin MacDonald stýrði liði Aston Villa eftir að Martin O'Neill hætti skyndilega rétt fyrir mót en eftir slakt gengi í deild og Evrópukeppni var það ljóst að hann yrði ekki ráðinn í starfið.

Houllier hefur verið tæknilegur ráðgjafi hjá franska knattspyrnusambandinu síðan að hætti sem stjóri Lyon. Phil Thompson, aðstoðarmaður hans hjá Liverpool, mun ekki verða aðstoðarmaður Houllier en það á eftir að koma í ljóst hver hreppir það starf.

Hinn 63 ára gamli Gérard Houllier verður aðeins annar útlendingurinn í sögunni til þess að setjast í stjórastólinn hjá Aston Villa en hinn er Tékkinn Jozef Venglos sem var stjóri liðsins frá 1990 til 1991.

Fyrsti leikur Houllier með Aston Villa verður á mánudagskvöldið þegar liðið heimsækir Stoke City á Britannia Stadium en það gæti einnig orðið fyrsti leikur Eiðs Smára Guðjohnsen með Stoke.