Hver fær gullskóinn í ár?

Það er ekki bara verið að keppa um Íslandsmeistaratitilinn í lokaumferð Pepsi-deildar karla í dag því gull- silfur- og bronsskórinn er einnig í boði fyrir þrjá markahæstu leikmenn deildarinnar.

Blikinn Alfreð Finnbogason er markahæstur fyrir lokaumferðina með 14 mörk en ólíkt hinum fjórum sem koma honum næstir þá mun Alfreð ekki spila með Blikum í dag þar sem að hann er í leikbanni.

FH-ingurinn Atli Viðar Björnsson var með þriggja marka forustu fyrir lokaumferðina í fyrra en KR-ingurinn Björgólfur Takefusa tók þá gullskóinn með því að skora fimm mörk í lokaleiknum sínum. Atli Viðar er nú í 3. sæti með 13 mörk, einu marki minna en Alfreð og jafn Stjörnumanninum Halldóri Orra Björnssyni sem er í 2. sæti á færri spiluðum leikjum.

Halldór Orri Björnsson verður alltaf hærri en Atli Viðar og Alfreð þar sem hann hefur spilað færri leiki en Atli og færri mínútur en Alfreð. Halldór Orri er því í bestu stöðunni takist honum að skora hjá Blikum í dag.

Grindvíkingurinn Gilles Ondo er tveimur mörkum á eftir Alfreð en er í bestu stöðunni verði hann jafn öðrum leikmanni. Ondo hefur aðeins leikið 19 leiki og verður því alltaf ofar á færri spiluðum leikjum.

Blikinn Kristinn Steindórsson þarf að taka upp hanskan fyrir Breiðabliksliðið í forföllum Alfreðs í dag en hann á minnstu möguleikanna á því að vinna gullskóinn.

Kristinn hefur skorað tveimur mörkum minna en Alfreð auk þess sem að hann hefur leikið alla leiki liðsins í sumar. Kristinn verður þó alltaf ofar en Atli Viðar nái hann að jafna hann þar sem að Kristinn hefur leikið mun færri mínútur.

Markahæstu menn í Pepsi-deild karla:

14 mörk

Alfreð Finnbogason, Breiðabliki 21 leikur/1870 mínútur

13 mörk

Halldór Orri Björnsson, Stjörnunni 20 leikir/1748 mínútur

Atli Viðar Björnsson, FH 21 leikur/1822 mínútur

12 mörk

Gilles Ondo, Grindavík 19 leikir/1710 mínútur

Kristinn Steindórsson, Breiðabliki 21 leikur/1669 mínútur