Áfram fundað í dag vegna gagntilboðsins

Forystufólk stjórnmálaflokkanna mun funda í dag til að meta gagntilboð Breta og Hollendinga í Icesavedeilunni sem barst stjórnvöldum í fyrrakvöld. Eftir að hafa farið yfir tilboðið með samninganefnd Íslands í fjármálaráðuneytinu í gær var ákveðið að sérfræðingar reiknuðu út hvað í tilboðinu felst.

Að loknum fundinum í gær töldu forsætis- og fjármálaráðherra að halda mætti viðræðum áfram á grunvelli gagntilboðsins. Formaður Sjálfstæðisflokksins taldi rétt að vera spar á yfirlýsingar og reyna ætti á hvort stjórn og stjórnarandstaða næðu saman um viðbrögð. Formaður Framsóknarflokksins virtist aftur á móti ekki hrifinn af tilboðinu og taldi það bera þess merki að ríkisstjórn Hollands væri fallin og kosningar færu fram þar og í Bretlandi í vor.