Allt brjálað út af grófri 11 ára stúlku

Þessa dagana er kvikmyndin Kick-Ass frumsýnd út um allan heim. Jafnframt hefur myndast nokkur andstaða gegn henni vegna persónunnar Hit Girl, 11 ára stúlku sem er leigumorðingi.

Hit Girl talar eins og argasti sjóari og slátrar heilu hópunum af fautum með miklum tilþrifum. Leikkonan Chloe Moretz, sem er 13 ára, fer með hlutverkið og þjálfaði sig í marga mánuði á undan. Leikstjórinn Matthew Vaughn ítrekar að móðir hennar hafi verið viðstödd tökur og samþykkt allt. Auk þess sé þetta ekki jafn slæmt og margir vilja meina.

"Við erum ekki að hneyksla fólk upp á grínið. Við fylgjum bara teiknimyndasögunni sem sagan er byggð á eftir. Það virðist snerta viðkvæmar taugar í fólki að heyra barn blóta og berjast. Það er kannski vanara að sjá börn sem fórnarlömb. En því er þó ekki að neita að þessi persóna berst eins og þjálfaður hermaður og gerir grófa hluti," segir leikstjórinn.

Kick-Ass fjallar annars um nokkra unglinga sem ákveða að gerast ofurhetjur, þrátt fyrir að hafa enga krafta. Nicholas Cage leikur föður Hit Girl. Hún er frumsýnd hérlendis um næstu helgi.

Við látum fylgja með hlekk á stiklu úr myndinni en ítrekum að hún er ekki fyrir viðkvæma og á vefnum sem hýsir hana stendur að hún sé bönnuð börnum yngri en 17 ára.

Hit Girl-stikla úr Kick-Ass.