Bandaríkjamenn grunaðir um að smygla börnum frá Haítí

Tíu Bandaríkjamenn, meðlimir trúfélags Babtista í Idaho, voru handteknir á Haítí í gær en þeir eru grunaðir um að hafa ætlað að smygla 33 börnum úr landi. Börnin eru á aldrinum tveggja mánaða til tólf ára.

Bandaríkjamennirnir, fimm konur og fimm karlmenn, voru stöðvaðir á landamærum Haítí og Dóminíska lýðveldisins en þeir sögðust hafa ætlað að flytja börnin á munaðarleysingahæli sem þeir væru að koma upp í Dóminíska lýðveldinu. Þeir höfðu hins vegar engin skjöl meðferðis sem heimiluðu þeim að flytja börnin úr landi. Lögreglan fór með þá grunuðu til Port au Prince, höfuðborgar Haítí.