Rúmlega þúsund manns nálægt gosstöðvunum

Töluvert af fólki hefur verið á ferð í Þórsmörk og á Fimmvörðuhálsi í tengslum við eldgosið þó fjöldinn hafi ekki jafnast á við það þegar mest hefur verið.

Lögregla áætlaði að um 250 bílar væru upp á Fimmvörðuhálsi um kvöldmatarleytið og mátti því reikna með að það þýddi að um 1.000-1.200 manns væru á svæðinu. Síðustu daga hefur bætt verulega í hópinn þegar líða tekur að kvöldi samkvæmt tilkynningu frá almannavörnum.

Að gefnu tilefni ítreka almannavarnir að fólk fari eftir leiðbeiningum björgunarsveita og lögreglu og virði lokanir sem eru á svæðinu. Það er allra hagur að svo sé þannig að ekki þurfi að grípa til frekari lokana en þegar hefur verið gert.

Þeir sem fara gangandi úr Þórsmörk upp á Morinsheiði eiga að halda sig á hefðbundnu gönguleiðinni um Fimmvörðuháls þ.e. um Strákagil, Kattarhryggi og að Morinsheiði. Lokað er frá Morinsheiði að Heljarkambi og Bröttufönn.