Hreiðar og Sigurður gætu þurft að borga á þriðja milljarð

Hreiðar Már Sigurðsson og Sigurður Einarsson gætu þurft að greiða skattinum á þriðja milljarð króna úr eigin vasa vegna niðurfellinga á lánum.

Reiði braust út hjá almenningi þegar fregnaðist að stjórn Kaupþings hefði rétt fyrir hrun fellt niður ábyrgðir starfsmanna sem fengu lán hjá Kaupþingi til að kaupa í Kaupþingi. Fram kom í fréttum okkar í gær gætu þeir þurft að greiða allt að 17,5 milljarða króna í skatt af niðurfellingunni eftir að skattayfirvöld komust að þeirri niðurstöðu að hún væri skattskyld. Samkvæmt heimildum fréttastofu getur hópur lykilstarfsmanna hjá nokkrum öðrum stórfyrirtækjum, meðal annars fjármálafyrirtækjum, búist við viðlíka reikningi frá skattinum. Eitt þeirra hefur þegar skotið svona máli til yfirskattanefndar.

Verði skattskylda niðurstaðan, fer skattprósentan eftir gjalddaga lánanna. En til að átta sig á upphæðunum, miðum við hér við 37 prósenta skatt. Upphæðir lánanna, birtust flestar í DV upp úr lánabók Kaupþings frá 2006 - lánin hafa að líkindum hækkað verulega síðan þá. Því gætu menn þurft að borga mun meira, en hér segir.

Helgi Sigurðsson gæti þurft að greiða minnst 166 milljónir til baka til skattsins, Bjarki Diego nær 240, Kristján Arason um 330, Steingrímur Kárason um 370 milljónir, Helgi Þór Bergs rúmar 400, Ármann Þorvaldsson höfundur Ævintýraeyjunnar vel yfir hálfan milljarð króna, Þorvaldur L. Sigurjónsson tæpar 600 milljónir, Ingólfur Helgason yfir sex hundruð milljónir, Ingvar Vilhjálmsson álíka mikið, Magnús Guðmundsson um 850 milljónir og svo eru það æðstu stjórnendurnir tveir. Fyrir ári var áætlað að lán þeirra vegna hlutabréfakaupanna voru komin í um 7 milljarða króna. Það þýðir að hvor um sig þarf að líkindum að punga út upp undir 2,6 milljarða króna. Fyrir þá upphæð mætti til dæmis kaupa um 50 væn einbýlishús í Reykjavík.

Ríkissjóður myndi gildna af þessum upphæðum en þó er ekkert í hendi, því yfirskattanefnd hefur ekki skorið úr um skattskyldu í svona máli og því enn óvíst hvort eða hvenær starfsmenn Kaupþings borgi þennan skatt eður ei.