Þýskir óttast ólykt á Oktoberfest

Þýskir vísindamenn eru í kapphlaupi við tímann til þess að gera lífið á október-bjórhátíðinni bærilegt fyrir gesti á næsta ári. Októberfest í Þýskalandi er stærsta bjórhátíð í heimi og þar koma saman milljónir manna og drekka bjór og borða bratwurst í risastórum tjöldum.

Hátíðin árið 2011 verður þó með eilítið öðru sniði en þær sem haldnar hafa verið hingað til því ákveðið hefur verið að banna reykingar alfarið í tjöldunum stóru.

Nú sjá menn hinsvegar fram á töluvert vandamál sem er lyktin sem sígarettureykurinn hefur hingað til hulið. Þegar daunninn af flötum bjór , matarleifum, mikið notuðum ferðaklósettum og ýmisskonar líkamslykt blandast saman verður úr mikill óþefur og berjast færustu vísindamenn þýskalands nú við vandamálið.

Lausnin gæti þó verið fundin því ein hugmyndin er að sprauta sérstakri bakteríulausn sem eyðir lykt á öll borð og bekki bjórtjaldana. Bjórframleiðandinn Hofbrau segist hafa byrjað að prófa lausnina í fyrra með afar góðum árangri.

Bakteríulausnin var upphaflega framleidd sem áburður en framleiðandinn komst að því að hún eyðir ólykt og hefur nú farið að markaðsetja hana á þann hátt.