Fast skotið á RÚV í nýrri myndaröð

Fremstu kvikmyndagerðamenn þjóðarinnar skjóta föstum skotum á Ríkisútvarpið í nýrri myndaröð sem þeir hafa ákveðið að birta á myndasíðunni YouTube. Leikstjóri myndskeiðanna er Grímur Hákonarson og hann skrifaði jafnframt handritið ásamt Hrafnkatli Stefánssyni. Jóhannes Haukur Jóhannesson, Friðrik Þór Friðriksson, Sveppi, Ilmur Kristjánsdóttir og Silja Hauksdóttir eru á meðal þeirra sem fara með aðalhlutverk

Þetta hófst allt með því að það var stór samstöðufundur kvikmyndagerðamanna á Hótel Borg eftir að Páll Magnússon tilkynnti um niðurskurð á kaupum á innlendum efni." segir Grímur í samtali við Vísi. Hann segir að þar hafi verið ákveðið að nota kvikmyndamiðilinn sjálfan í að mótmæla. „Mér datt í hug að gera áróðursmyndbönd gegn RÚV og Ragnar Bragason gerði þarna Næturvaktarsketch," segir Grímur.

Grímur segir að kjarninn með aðalpersónunni sé sá að það sé ekki menningarlegur áhugi hjá stjórnendum RÚV. Í stjórnunarstöður hjá RÚV sé bara ráðið pólitískt fólk eða fólk sem hafi einungis sinnt fréttum. „Það eru ekki menn þarna sem eru búnir að lesa heimsbókmenntirnar. Eins og Páll Magnússon. Hann er bara einhver fréttamaður, hann er búinn að vera að lesa fréttir af skjá alla sína ævi," segir Grímur. Það sé atriði sem hann sé að reyna að fanga í myndskeiðunum. Grímur tekur þó skýrt fram að aðalpersónan sé ekki byggð á neinum einum dagskrárstjóra heldur mörgum.

Grímur segir það fyrst og fremst vera ætlun sína að gagnrýna það að peningarnir sem skattgreiðendur greiði til RÚV fari í eitthvað annað en þeir eiga að fara í. „Þetta með þakið, einu sinni var gefin sú skýring að það væri ekki hægt að kaupa dagskrárefni af því að það þyrfti að gera við þakið á húsinu," segir Grímur.

Grímur segir að þetta efni hafi fyrst og fremst verið í dreifingu á netinu og það hafi fengið ágætar viðtökur. Hann veit þó ekki hvort stjórnendur RÚV hafi kynnt sér það.

Smelltu hér að neðan til að sjá myndskeiðin.