Ísraelar og Palestínumenn ræðast aftur við

Óbeinar viðræður milli Ísraela og Palestínumanna hefjast að líkindum í næstu viku.

Arababandalagið hefur lagt blessun sína yfir viðræðurnar og Palestínumenn hafa staðfest að þeir hafi fengið loforð um að ekki verði unnið við umdeildar byggingaframkvæmdir í Austur-Jerúsalem.

George Mitchell sérlegur sendimaður Baracks Obama mun leiða viðræðurnar. Þær fara þannig fram að Mitchell ræðir við leiðtoga þjóðanna hvorn fyrir sig og ber svo skilaboð á milli.

Mahmoud Abbas forseti Palestínumanna mun svo fara til Washington síðar í þessum mánuði til viðræðna við Barack Obama forseta.

Abbas sagði í samtali við arabiskt dagblað að viðræðurnar muni standa í fjóra mánuði.

Hamas samtökin hafa þegar hafnað þessum viðræðum. Þau segja að samþykki Arababandalagsins sé aðeins samþykki fyrir því að ísraelar fremji frekari glæpi gegn palestinsku þjóðinni.