Zenden áfram hjá Sunderland

Boudewijn Zenden mun spila með Sunderland á næstu leiktíð en hann hefur skrifað undir nýjan samning við félagið.

Zenden kom til Sunderland síðasta sumar en þá var hann samningslaus eftir að hafa verið á mála hjá Marseille í Frakklandi.

„Ég er hæstánægður með að Bolo hafi samþykkt að vera hjá okkur áfram," sagði Steve Bruce, stjóri Sunderland við enska fjölmiðla.

„Hann býr yfir mikilli reynslu bæði innan vallar sem utan. Hann hefur góð áhrif á aðra leikmenn sem er mikilvægt enda margir ungir leikmenn sem hafa verið að koma upp hjá okkur."