Stálu frystikistum, pönnum og flatskjá

Frystikistur, flatskjár og pottar voru meðal þess sem stolið var úr vinnubúðum verktaka við Herdísarvík í gærkvöldi eða nótt. Verktakinn vinnur við lagningu Suðurstrandavegar.

Úr vinnubúðunum var stórri uppþvottavél, þremur frystikistum, tveimur þvottavélum, tveimur þurrkurum, gaseldavél, gufuofni, iðnaðarhrærivél, örbylgjuofni og flatskjá stolið. Þessu til viðbótar var einnig iðnaðarvélum stolið og fjöldanum öllum af pottum og pönnum.

„Í þetta verk hefur þurft stóran vöruflutningabíl," segir á vef lögreglunnar. Brotist var inn í vinnubúðirnar á tímabilinu eftir klukkan 20 í gærkvöldi og fyrir klukkan 8 í morgun.

Þeir sem geta veitt upplýsingar um málið eru beðnir um að hafa samband við lögregluna á Selfossi í síma 480 1010.