Byssumaðurinn neitar sök

Maðurinn sem sænska lögreglan handtók í gær og er grunaður um að hafa skotið á fjölda innflytjenda að undanförnu neitar sök. Farið verður fram á gæsluvarðhald yfir honum. Frá þessu er greint á vef sænska ríkisútvarpsins þar sem fjallað erum blaðamannafund sem lögreglan í Malmö boðaði til í hádeginu vegna málsins.

Maðurinn sem 38 ára gamalla var handtekinn á heimili sínu síðdegis í gær en handtakan var fyrst gerð opinber í morgun. Maðurinn er talinn bera ábyrgð á allt að 20 skotárásum í Malmö, en árásirnar hafa einkum beinst að innflytjendum þar í borg. Mikill ótti greip um sig meðal íbúa og voru innflytjendur varaðir við því að vera einir á ferð. Einn hefur látið lífið í skotárásunum og átta særst, einn alvarlega.

Tvö skotvopn fundust á heimili mannsins í gær. Á blaðamannafundinum vildi lögregla ekki greina nákvæmlega hvað leiddi til þess að maðurinn var handtekinn. Þó kom fram að það hafi meðal annars verið vegna ábendinga sem bárust frá almennum borgurum. Þá vildi lögregla ekki segja til um hvort að maðurinn eigi sér vitorðsmann.