Burnley á hraðferð niður - Tap á heimavelli fyrir Blackburn

Falldraugurinn virðist hafa hreiðrað vel um sig á Turf Moor. Burnley tapaði 0-1 fyrir Blackburn í nágrannaslag í ensku úrvalsdeildinni í dag. Liðið er í 19. sæti deildarinnar, þremur stigum á eftir Hull og West Ham.

David Dunn skoraði eina mark leiksins úr vítaspyrnu í fyrri hálfleik. Blackburn byrjaði betur og forysta þeirra var verðskulduð en vítaspyrnudómurinn þó ekki réttur.

Martin Olsson lét sig falla áður en einhver snerting var og dómarinn féll í gildruna. Fleiri mörk voru ekki skoruð og Blackburn stökk upp í tíunda sæti deildarinnar.

Jóhannes Karl Guðjónsson var ekki í leikmannahópi Burnley sem hefur verið í frjálsu falli síðan Brian Laws var ráðinn knattspyrnustjóri liðsins. Sú ráðning verður að teljast ein sú allra sérstakasta í sögu ensku úrvalsdeildarinnar.

Klukkan 15 hefst leikur Liverpool og Sunderland og verður hann að sjálfsögðu sýndur beint á Stöð 2 Sport 2.